Endurkaup skuldabréfa til skoðunar

Vakti það athygli hve lítil eftirspurn var eftir japönskum skuldabréfum með 20 ára líftíma í útboði sem fór fram um miðjan síðasta mánuð, en í kjölfarið hækkaði ávöxtunarkrafa skuldabréfa með 30 ára líftíma upp í 3,185% og hefur aldrei verið hærri.

Ávöxtunarkrafan lækkaði síðan eftir að fréttir bárust af því að stjórnvöld kynnu að ráðast í endurkaup langra skuldabréfa til að koma í veg fyrir að offramboð skapist. Samhliða því greindu fjölmiðlar frá því að dregið yrði úr útgáfu skuldabréfa með mjög langan líftíma, bæði til að stuðla að bættu jafnvægi á markaðinum og til að slá á áhyggjur fjárfesta af skuldastöðu japanska ríkisins.

Upphaflega stóð til að ríkissjóður Japans myndi selja ríkisskuldabréf að andvirði liðlega 172.000 milljarða jena á þessu ári, jafnvirði um 1.200 milljarða dala, og að þar af yrði hlutur skuldabréfa með 20 til 40 ára líftíma rúmlega 24.000 milljarðar jena.

Hefur Reuters eftir heimildarmönnum sínum að japanska fjármálaráðuneytið muni taka endanlega ákvörðun um endurkaup skuldabréfa í lok þessa mánaðar, eftir að hafa ráðfært sig betur við helstu kaupendur á skuldabréfamarkaðinum, en til að verði af endurkaupunum myndi japanska þingið þurfa að veita til þess sérstaka heimild í fjárlögum. ai@mbl.is