Regluverkið kæfir frumkvæði

Íslandsbanki hefur á undanförnum árum skoðað ýmis tækifæri bæði til innri og ytri vaxtar bæði hér innanlands og utan. Í viðtali við ViðskiptaMoggann ræðir Jón Guðni Ómarsson bankastjóri Íslandsbanka um nýafstaðið útboð á hlut ríkisins í bankanum, mögulegar samrunaviðræður við Kviku, framtíðarsýn bankans og margt fleira.

Íslenskir bankar þurfa að lúta ströngustu reglum í Evrópu. Jón Guðni segir að þörf sé á endurskoðun á regluverki hér á landi.

„Í fyrsta lagi eru eiginfjárkröfurnar hér á landi mjög háar og reglubyrðin almennt mikil. Við erum með dæmi um svokallaða gullhúðun þar sem við förum lengra en Evrópureglur segja til um og það ítrekað. Þetta mikla regluverk kæfir stundum frumkvæðið.“