Liverpool virkjar ákvæði í samningi Hollendingsins

Englandsmeistarar Liverpool hyggjast virkja kaupákvæði í samningi hollenska knattspyrnumannsins Jeremie Frimpong, sem leikur með Bayer Leverkusen.

Breska ríkisútvarpið og The Times eru á meðal þeirra miðla sem greina frá því að Liverpool muni virkja ákvæði upp á 29,5 milljónir punda í samningi hins fjölhæfa Frimpongs.

Hann leikur oftast í stöðu hægri vængbakvarðar en getur einnig spilað í hægri bakverði, hægri kanti og sem sóknarsinnaður miðjumaður.

Talið er líklegast að Liverpool hugsi Frimpong sem arftaka hægri bakvarðarins Trent Alexander-Arnold, sem er á förum til Real Madríd.

Viðræður Liverpool og Leverkusen eru sagðar ganga vel og er Frimpong, sem varð Þýskalandsmeistari með Leverkusen á síðasta ári, áhugasamur um að semja við Englandsmeistarana.

• Blogga um frétt