Fyrsta tilboð United í sóknarmanninn

Enska knattspyrnufélagið Manchester United hefur lagt fram fyrsta tilboð í Bryan Mbeumo, leikmann Brentford.

Samkvæmt The Athletic býður United 45 milljónir punda í sóknarmanninn plús tíu milljónir í árangurstengdar greiðslur.

Mbeumo, sem er 25 ára, lék stórkostlega með Brentford á síðustu leiktíð, skoraði 20 mörk og lagði upp átta í 38 deildarleikjum.

Fyrr í vikunni greindi The Athletic frá að Mbeumo hefði mikinn áhuga á að ganga til liðs við United. Það þykir þó líklegt að Brentford hafni fyrsta tilboðinu en talið er að félagið vilji fá 60 milljónir punda fyrir kamerúnska sóknarmanninn.

• Blogga um frétt