Matur | mbl | 12.6.2025 | 6:30

Bjarki gerir hina fullkomnu grillmáltíð

Bjarki Snær Þorsteinsson, matreiðslumeistari, er snillingur á grillinu og töfraði fram þennan girnilega rétt fyrir lesendur. mbl.is/Eggert Jóhannesson

Bjarki Snær Þorsteinsson matreiðslumaður á Fröken Reykjavík hefur ávallt gaman af því að grilla og gefur hér uppskrift að dásamlegri nautasteik og meðlæti sem upplagt er að prófa við næsta tækifæri. Það má segja að þetta sé hans fullkomna grillmáltíð þessa dagana.

Syndsamlega gott meðlæti með nautaskirt-steikinni hans Bjarka. mbl.is/Eggert Jóhannesson

Bjarki er landsliðskokkur en þessa dagana er hann í fríi frá landsliðsæfingum þar sem hann á von á barni númer tvö og ætlar að gefa sér tíma til að hlúa að fjölskyldunni þegar það mætir í heiminn.

„Ég vil ekki vera að taka pláss frá öðrum sem hefur meiri tíma og tök til að taka þátt á meðan það eru miklar annir á mínu heimili og vona svo sannarlega að liðinu gangi vel í þeim verkefnum sem fram undan er. Ég óska liðinu alls hins besta og hlakka til að sjá þau fá gullið á heimsmeistaramótinu í matreiðslu á næsta ári,“ segir Bjarki með bros á vör.

Bjarki Snær Þorsteinsson hugsar fyrir hverju smáatriði. mbl.is/Eggert Jóhannesson

„Á meðan verð ég að vinna á veitingastaðnum Fröken Reykjavík hjá Snædísi Jónsdóttur, þjálfara íslenska kokkalandsliðsins, sem eru mikil forréttindi,“ bætir Bjarki við.

Grillar á kolagrillið þegar hann nostrar við matinn

Á sumrin er aldrei langt í grillið hjá Bjarka. „Ég hef alltaf gaman að því að grilla mat hvort sem það er kjöt, meðlæti eða annað. Ég gríp í gasgrillið þegar ég hef stuttan tíma en grilla hiklaust á kolagrilli þegar ég er að nostra við matinn og hef meiri tíma þar sem það gefur talsvert meira bragð af því sem er grillað og auk þess er mun skemmtilegra að vinna með kol heldur en gasið.“

Smælkið hans Bjarkar lyftir máltíðinni upp á hærra plan. mbl.is/Eggert Jóhannesson

Mér finnst meðlæti með steik líka skipta máli þó að hún geti verið góð ein og sér. Mér finnst góð sósa og meðlætið oft lyfta réttinum upp á hærra plan. Einn af mínum uppáhaldsgrillréttum þessa dagana er nautaskirt- steik frá Umi ásamt grilluðum eryngisveppum, vorlauk, bökuðum smælki-kartöflum og epla- og kryddjurtadressingu sem er svona öðruvísi útgáfa af chimichurri. Ómótstæðilega gott saman og alls ekki flókið að útbúa. Mig langar að deila þessari uppskrift með lesendum.“

Epla- og kryddjurtadressingin hans Bjarka er svona öðruvísi útgáfa af chimichurri. mbl.is/Eggert Jóhannesson

Nautaskirt- steik frá Umi borin fram grilluðum eryngisveppum, vorlauk, bökuðum smælki-kartöflum og epla- og kryddjurtadressingu

Fyrir 2

Nautaskirt-steik

500-600 g nautaskirt-steik
Salt eftir smekk
Ólífuolía eftir smekk

Aðferð:

Skerið steikina í viðeigandi stærð, kryddið til með salti og berið smá ólífuolíu á steikina.
Hitið grillið á hæsta hita.
Grillið steikina á sjóðheitu grilli þar til hún nær 52°C í kjarnhita og leyfið henni svo að hvíla í 5-10 mínútur.

Eryngi, sveppir og vorlaukur

200 g eryngisveppir
100 g vorlaukur, skorinn smátt
Ólífuolía eftir smekk
Salt eftir smekk

Aðferð:

Setjið sveppina ásamt vorlauknum í bakka eða fat og setjið yfir það ólífuolíu og salt eftir smakk.
Grillið þar til hráefnið er vel brúnað
Setjið í skál og berið síðan fram með skirt-steikinni þegar hún er tilbúin.

Smælki-kartöflur

300-400 g smælki
Japanskt majónes eftir smekk
Sýrð sinnepsfræ eftir smekk
Kryddjurtir að eigin vali

Aðferð:

Setjið nokkuð af vatni í pott og setjið kartöflurnar ofan í.
Sjóðið kartöflurnar í vatni með 10% salti, til að mynda ef það er 1 l af vatni þá er vert að setja 100 g af salti út í.
Sjóðið ásamt kryddjurtum sem eru til á heimilinu í 30 mínútur.
Hellið síðan vatninu af og setjið kartöflurnar á ofnplötu klædda bökunarpappír eða álpappír.
Merjið kartöflurnar, setjið olíu yfir og bakið í ofninum á 200°C hita í 20 mínútur eða þar til þær verða stökkar.
Blandið síðan kartöflunum saman við japanskt majónes, sýrð sinnepsfræ og ferskar kryddjurtir sem eru til, t.d. graslauk, steinselju og dill.
Setjið í skál og berið fram með steikinni þegar hún er tilbúin.

Epla- og kryddjurtadressing – öðruvísi chimichurri

125 g ólífuolía
2 msk. rauðvínsedik
1 búnt söxuð steinselja
1 búnt dill
1 stk. grænt epli, skorið í litla teninga
1 lítill chili, saxaður
4 hvítlauksrif, söxuð
1 tsk. flögusalt
10 g ferskur sítrónusafi
örlítið af svörtum pipar
Gott að toppa dressinguna með beykisveppum

Aðferð:

Setjið allt hráefnið í skál og blandið vel saman.
Setjið síðan í krukku og látið helst standa í kæli yfir nótt til að bragðið nái að fara út í olíuna.
Setjið síðan epla- og kryddjurtadressinguna ofan á steikina eftir að búið er að grilla hana.