Myndir: Mótmæltu hælisleitendastefnu stjórnvalda

Mótmælafundur hóps sem kallar sig Ísland þvert á flokka fór fram á Austurvelli í dag en þegar ljósmyndara mbl.is bar að garði höfðu tæplega hundrað manns safnast saman, margir með íslenska fánann reistan á loft.

Um var að ræða annan mótmælafund hópsins en sá fyrri vakti mikla athygli og harða gagnrýni, en þá kom til ryskinga á milli mótmælenda á vegum hópsins og svo mótmælenda sem boðuðu til mótmæla gegn rasisma.

Vilja fimm ára hlé

Á fundarboði félagsins segir að fundurinn hafi verið haldinn vegna stefnu stjórnvalda í málefnum hælisleitenda en í kröfugerð sem fylgdi boðinu er meðal annars farið fram á að hælisleitendur verði vistaðir í lokuðu úrræði eða sendir úr landi meðan á bakgrunnsrannsókn stendur og að þeir sem komi án skilríkja verði sendir til baka.

Þá var líka farið fram á að fimm ára hlé verði gert á afgreiðslu nýrra hælisumsókna.

Fundarmenn voru Baldur Borgþórsson, fyrrverandi varaborgarfulltrúi, Jón Magnússon hæstaréttarlögmaður og Ágústa Árnadóttir.

Voru mótmælendur hvattir til að mæta með íslenska fánann og góða skapið.