„Skóli verður aldrei félagsmiðstöð“

Árni Guðmundsson félagsuppeldisfræðingur, kennari og fræðimaður á sviði tómstunda- og félagsmálafræða á menntavísindasviði Háskóla Íslands, segir ákvörðun Akureyrarbæjar um skipulagsbreytingar sem samþykktar voru í bæjarráði í síðustu viku líta út fyrir að vera aðlögun tómstunda- og félagsmála að skólastarfi.

Árni, sem starfað hefur í fræðasamfélaginu í yfir 15 ár, var formaður samtaka norrænna félagsmiðstöðva í jafn langan tíma og vinnur nú að doktorsritgerð, þar sem hann rannsakar samspil félagsmiðstöðva við samfélagið, segir í samtali við mbl.is, að skóli verði aldrei félagsmiðstöð og félagsmiðstöð aldrei skóli.

Segist hann myndu, sem forsvarsmaður Akureyrarbæjar, snúa ákvörðuninni við, byrja aftur á byrjunarreit og fara í gegnum málið frá A-Ö út frá forsendum félagsmiðstöðvastarfs en ekki skólastarfs.

Frétt af mbl.is

Ákvörðun tekin í bergmálshelli verði endurskoðuð

Mikill áhugi en engin þekking

„Þetta er svipað og ef ég færi að reyna að setja upp ferðamálafyrirtæki. Ég hef mikinn áhuga á ferðamálum og ég myndi gera það af góðum vilja. Ég er hins vegar félagsuppeldisfræðingur og hef enga þekkingu til að stofna slíkt fyrirtæki.“

Félagsuppeldisfræðingurinn segir allt málfarið í kringum ákvörðunina vera skólamálfar og ef starfslýsingarnar og greinargerðin séu lesnar sjáist að embættismenn sem komu nálægt henni séu með einhvers konar kennarabakgrunn.

„Þessi nálgun er ekki út frá forsendum félagsmála, þetta er bara eitthvað skólamál, sem er fínt til síns brúks en skóli verður aldrei félagsmiðstöð og félagsmiðstöð aldrei skóli.

Ég sá að það var komin auglýsing þannig að það er ljóst að þetta er eitthvað ferli sem hefur átt sér stað undir sjónlínu lengi.“

Frétt af mbl.is

Öllu starfsfólki félagsmiðstöðvanna sagt upp

Sennilega lítill skilningur á starfinu á Akureyri

Árni segir starfslýsingarnar metnaðarfullar en að hann hafi rekið augun í að gert sé ráð fyrir frímínútnagæslu og vinnu með einhverja hópa innan skólans. Segir hann það virka svolítið eins og verið sé að taka einn fræðageira og gera hann að einhverjum skólageira.

„Þarf að hafa háskólamenntaðan tómstundafræðing og félagsmálafræðing í því að vakta börn eða hjálpa til með einhverja hópa sem eru í veseni inni í kennslu?“ Spyr Árni og bætir því við að verið sé að verja peningum í hluti sem séu ekkert skildir félagsmálastarfi.

Það sem vekur athygli, einkum athygli hans í málinu, er að það sé fullt af góðu fagfólki á Akureyri og að Akureyri hafi verið að gera fína hluti í æskulýðs- og félagsmálum en við þröngan kost og sennilega lítinn skilning ef marka megi þessi síðustu spor.

Starfið verður ólíkt milli skóla

„Ef hugur hefði raunverulega fylgt máli hefði farið í gang einhver vinna og ferli til að kanna hvernig hægt væri að vinna úr þessari stöðu og búa til eitthvað módel sem passar.

Það sem gerðist í Hafnarfirði og mun gerast á Akureyri er að starfið verður ólíkt á milli skóla. Því miður er það þannig að það er mjög takmarkaður skilningur á mikilvægu félagsuppeldisfræðinni og það er greinilegt að enginn slíkur hefur komist með puttana að þessu skipulagi.

Reykjavíkurborg leysti þetta fyrir mörgum árum og þar er fín starfsskrá og þar eru menn innan skólanna.“

• Blogga um frétt