Eftirspurnin fór fram úr væntingum

Yfir 31.000 einstaklingar tóku þátt í útboðinu í gegnum tilboðsbók A, sem var sérstaklega ætluð einstaklingum með íslenska kennitölu. Þeir fengu samanlagt úthlutaðar um 815,6 milljónir hluta. Meðalupphæð áskriftar var um 2,8 milljónir króna.

Tilboðsbók B, sem var opin bæði einstaklingum og lögaðilum, fékk tilboð upp á 84,3 milljarða króna, en aðeins 56 aðilar fengu úthlutaða hluti í þessari bók. Engin úthlutun fór fram í tilboðsbók C, sem var ætluð fagfjárfestum.

„Við bjuggumst við eftirspurn í kringum 5-10 milljarða frá almenningi, svo þetta kom okkur sannarlega á óvart,“ segir Jón Guðni. „Það var greinilegt að áhuginn á bankanum var mikill og kynning okkar á varfærnum banka með mikil tækifæri til vaxtar fékk góðan hljómgrunn, við erum mjög stolt af því.“

Hann segir ýmislegt hafa spilað saman, meðal annars stöðugleika í íslensku efnahagslífi þrátt fyrir umrót í alþjóðamálum, hagstætt hlutabréfaverð og að vegferð bankans höfðaði til almennings. Ætli þetta frábæra vorveður hafi ekki hjálpað líka til, segir Jón Guðni.

„En umfram allt var þetta niðurstaða mikillar og markvissrar vinnu sem við höfðum lagt í áður en útboðið fór fram,“ bætir hann við. „Við fundum áhugann frá fjárfestum, bæði innanlands og erlendis, löngu áður en opnað var fyrir útboðið sjálft.“

Varðandi framkvæmdina sjálfa segir Jón Guðni að hún hafi heppnast afar vel. „Það var sérstaklega ánægjulegt að sjá almenning koma sterkt inn og finna um leið þennan mikla áhuga frá fagfjárfestum, sem koma vonandi sterkir inn á eftirmarkaði.“

Verðið sem fékkst í útboðinu telur hann einnig hafa verið ásættanlegt. „Þótt ekki hafi verið um beinan afslátt að ræða, þá var þetta stór sala á skömmum tíma, og seljandinn, sem var ríkið, og kaupendur virðast ánægðir,“ segir hann. „Hluturinn seldist vel og síðan þá hefur gengi hlutabréfa hækkað, svo fjárfestar hafa þegar fengið góða ávöxtun.“

Í kjölfar útboðsins voru full nöfn, kennitölur og þær upphæðir sem þátttakaendur í útboðinu keyptu fyrir birtar opinberlega.

Spurður um viðbrögð við því segir hann að um óvenjulega stöðu hafi verið að ræða.

„Það er óvenjulegt að þessar upplýsingar skyldu vera birtar, en á sama tíma var ferlið gagnsætt og það lá fyrir fyrir fram að nöfnin yrðu birt. Ég ætla ekki að setja fram skoðun á því hvort það hefði átt að fara öðruvísi að þessu enda komum við hvergi að fyrirkomulaginu, það var alfarið í höndum ríkisins,“ segir hann. 

Lesa má viðtalið í heild í ViðskiptaMogganum.