Öll spjót stóðu á dómsmálaráðherra

Við upphaf þingfundar voru störf forseta rædd, einu sinni sem áður, en þar vöktu helst athygli ræður sem beindust að dómsmálaráðherra, Þorbjörgu Sigríði Gunnlaugsdóttur.

Ingibjörg Isaksen þingflokksformaður Framsóknar stóð þar fyrst fyrir máli sínu og falaðist eftir afsökunarbeiðni frá dómsmálaráðherra vegna orða sem hún lét falla á þingfundi síðastliðinn föstudag, þar sem hún svaraði óundirbúinni fyrirspurn Ingibjargar með því að spyrja hana hvort hún kynni ekki að skammast sín.

Ráðherra varð við ósk þingflokksformannsins:

„Mér finnst mér algerlega að meinalausu að biðjast afsökunar hafi háttvirtur þingmaður tekið orðum mínum illa – sem ég heyri að hún gerði,“ sagði hún meðal annars og í kjölfarið þakkaði Ingibjörg fyrir sig.

Síðar tók til máls Bergþór Ólason þingflokksformaður Miðflokksins og gerði athugasemd við orðalag hins sama ráðherra í ræðu á eldhúsdegi í síðustu viku, þar sem hún þótti gefa í skyn að fyrri sala á hlut ríkisins í Íslandsbanka hefði leitt af sér sakamálarannsókn.

Ráðherra brást einnig við þeirri ábendingu:

„Auðvitað er það alveg rétt að það fór enginn í fangelsi og það er bara fín athugasemd og ég skal glöð gangast við því að svo var ekki.“

Áslaug Arna Sigurbjörnsdóttir þingmaður Sjálfstæðisflokks gaf lítið fyrir svör ráðherrans og sagði um „efsökunarbeiðni“ til Ingibjargar að ræða. Þá þótti henni ráðherrann gera lítið úr gagnrýni um orð hennar um sakamálarannsókn og hvatti ráðherrann til þess að draga orð sín þar um á eldhúsdegi til baka.

Ráðherra brást ekki við hvatningu þingmannsins.

Upplýsingaóreiða veiðigjalda

Guðrún Hafsteinsdóttir formaður Sjálfstæðisflokksins beindi spurningu að Kristrúnu Frostadóttur forsætisráðherra um vinnubrögð við veiðigjaldafrumvarpið.

Guðrún sagði það grundvallaratriði í lýðræðisríki að löggjafinn fengi réttar, skýrar og fullnægjandi upplýsingar áður en hann tekur afstöðu til lagafrumvarpa. Í umræðum um veiðigjaldafrumvarpið hefði komið fram sífellt skýrari mynd og Alþingi ekki fengið heildstæðar og réttar upplýsingar. Vísaði hún til þess að ný gögn frá Skattinum sýndu að veiðigjöld á þessu ári yrðu mun hærri en áður hefði verið gefið til kynna.

Ráðherrann sagði málið snúast um aðferðafræði og það væri klassískt atriði í pólitík að reyna að láta efni snúast um eitthvað annað en það snýst um. Enginn vissi hversu há veiðigjöldin yrðu.

Umdeild vísitölutenging

Að undanskildum störfum forseta og óundirbúnum fyrirspurnum fór mest fyrir umræðu um tengingu launavísitölu við almannatryggingakerfið.

Fátt kom fram í þeim umræðum sem ekki hefur verið fjallað um á síðum blaðsins áður. Þingmenn viðruðu áhyggjur af því að aðgerðin myndi ekki duga til að leiðrétta meinta kjaragliðnun, meira þyrfti til, á meðan aðrir viðruðu áhyggjur af því að með aðgerðinni væru útgjöld ríkissjóðs sjálfstýrð sem gæti haft alvarlegar afleiðingar í för með sér.

Þá var gagnrýnt að vísitalan endurspeglaði ekki endilega launahækkanir á almennum vinnumarkaði og að tenging við hana gæti virkað letjandi á vinnandi fólk.

Umræðu um málið var að lokum frestað.